Mien lütji Dörp

Mien lütji Dörp mit de tein Huusen
mien lütji Dörp dat is nich mehr
wat wee dat moi in mien Besinnen
wat deit mi dat in d’ Haart woll säär

Een Mestfolt un een hoogen Törfbüld
achter elker Huus wee de to sehn
de Röäk nu noch mien Denken füllt
wenn ik mi an de Eekboom lään
De Boom is eenzich hier noch blääven
stollt kikkt de Kron wiet over d’ Diek
blods in hum seech ik noch Lääven
wenn ik so över d’ Land henkiek

Dat Kinnerlachen is verweiht
keen flutterich Wicht is mehr to sehn
keen Krööger mehr vör d’ Kroochdör steit
keen oal Minsch mehr good to Been

Ik drei mi üm – moot eenfach goahn
mien Been’n sünd stief as Eekenhollt
mi rullt ut d’ Ooch een lütji Troanik spöär –
nu word dat Haart mi kollt